मानव अधिकार

संसारभर नै महिलामाथि हजारौं वर्षदेखि निरन्तर दमन, उत्पीडन र विभेद हुँदै आएको छ । यस्ता विभेद र उत्पीडतविरुद्ध महिलाले प्रतिरोध, विद्रोह र संघर्ष गर्दै आइरहेका छन् । महिलालाई मानिसको व्यवहारै नगर्ने दास व्यवस्थाको दमन, सामन्ती शोषण र उत्पीडनविरुद्ध महिलाले निकै ठूला संघर्ष गरेका छन् । अठारौं शताब्दीमा बेलायतमा सुरु भएको औद्योगिक क्रान्तिसँगै महिला पनि श्रमिकका रूपमा श्रमबजारमा प्रवेश हुन पुगे, तर उनीहरूमाथिको शोषण र उत्पीडनले निरन्तरता पाइरह्यो । महिलामाथि हुने दासप्रथाको विरोध हुँदै कलकारखाना र उद्योगमा हुने शोषण, हिंसा र विभेदविरुद्ध उठेको आवाज १९ औं शताब्दीको मध्यतिर आइपुग्दा पितृसत्तात्मक शोषणको अन्त्य, मतदानको अधिकार, समान अधिकार र अवसरको मागमा रूपान्तरित हुन पुग्यो ।