भक्तपुर, मङ्सिर  ४ गते ।  भक्तपुर क्यान्सर अस्पतालले १४ वर्षमुनिका बालबालिकाको क्यान्सर उपचार निःशुल्क सेवा सुरुआत गरेको छ । अस्पतालले यही मङ्सिर २ गतेदेखि १४ वर्षमुनिका बालबालिकाको क्यान्सर रोगको सम्पूर्ण उपचार निःशुल्क सेवा सुरु गरेको अस्पतालका निमित्त कार्यकारी निर्देशक डा. उज्ज्वल चालिसेलेलाई जानकारी दिनुभयो । स्वास्थ्य तथा जनसङ्ख्यामन्त्री प्रदीप पौडेलले सरकारी अस्पतालमा १४ वर्षमुनिका बालबालिकाको क्यान्सर उपचार निःशुल्क गर्नेगरी गत कात्तिक ११ गते मन्त्रीस्तरीय निर्णय गरेसँगै अस्पतालले उक्त निर्णयलाई कार्यान्वयनमा ल्याएको हो ।

काठमाडौँ, मङ्सिर ३ गते । पूर्वसभामुख दमननाथ ढुङ्गानाको पशुपतिनाथस्थित आर्यघाटमा राजकीय  सम्मानका साथ अन्त्येष्टि गरिएको छ । नेपाली सेनाको एक टुकडीले दिवङ्गत ढुङ्गानाको सम्मानमा शोक सलामी अर्पण गरेको थियो । ढुङ्गानाको पार्थिव शरीरमा उहाँका छोराहरूले दागबत्ती दिनुभयो । पूर्व सभामुख ढुङ्गानाकाे सम्मानमा १७ तोपको सलामीसमेत दिइएको थियो । कलेजोसँग सम्बन्धित समस्याका कारण केही समयदेखि उपचाररत ढुङ्गानाको पुरानो बानेश्वरस्थित फ्रन्टलाइन अस्पतालमा ८३ वर्षको उमेरमा आइतबार दिउँसो निधन भएको थियो ।

कार्यालयको मूल ढोकाबाट छिर्नेबित्तिकै पोखरा महानगरपालिकाको सरसफाइ शाखामा भेटिन्छन्, हर्कबहादुर गायक (गन्धर्व) । तीस वर्ष जागिरे जीवन बिताएका उनले सारङ्गी सिकेनन् । शाखा अधिकृत भइसक्दा उमेरले ५५ टेकेका उनलाई अचेल महसुस हुन्छ, ‘सारङ्गी नसिकेर गल्ती गरेछु ।’  पोखरा झलकमान गन्धर्वको सहर हो । पोखरा सारङ्गीको सहर हो । सहरमा चलिरहेछ ‘पूर्णबहादुर सारङ्गी’ । अहिलेसम्म यो फिल्मले हिसाबकिताबका ‘रेकर्ड’ हरू तोडिसकेको छ । फिल्मले रुवाउँछ, हसाउँछ, जीवनसँग जोड्छ । यथार्थको नजिक पुर्‍याउँछ । पर्दाभित्रका पात्रमा आफू भेटिन्छ । फिल्मको धर्म ‘पूर्णबहादुरको सारङ्गी’ ले पूरा गरेको छ । फिल्म गन्धर्व समुदायको वास्तविकतासँग कति नजिक छ ?