१ लाखभन्दा बढी किशोरीका लागि क्यान्सरविरुद्धको एचपिभी खोप लगाइने

काठमाडौँ :  काठमाडौँ जिल्लामा १ लाख १० हजार २६३  किशोरीलाई पाठेघरको मुखको क्यान्सरविरुद्ध ‘ह्युमन पापिलोमा भाइरस’ (एचपिभी) लगाइने भएको छ । 

जनस्वास्थ्य कार्यालय काठमाडौँद्धारा आयोजित जिल्ला खोप समन्वय समिति र सञ्चार क्षेत्रको अभिमुखीकरण कार्यक्रममा कार्यालयका वरिष्ठ जनस्वास्थ्य प्रशासक सतिश विष्टले काठमाडौँका ११ स्थानीय तहका १ लाख १० हजार २६३ जना किशोरीलाई खोप लगाइने जानकारी दिनु भयो ।  

जस्मा कक्षा ६ देखि १० सम्मका ९७ हजार ५४० र विद्यालयबाहिर रहेका १० देखि १४ वर्ष उमेर समूहका १२ हजार ७२३ किशोरीहरु हुनेछन् । 
काठमाडौँ महानगरपालिका क्षेत्रमा सबैभन्दा बढी ५१ हजार ३४७ किशोरी र सबैभन्दा कम नागार्जुन नगरपालिकामा ४ हजार ६५२ किशोरीहरुले एचपिभी खोप लगाउन पाउने छन् ।

१ हजार १०१ विद्यालय र १४६ अन्य खोप केन्द्रमार्फत ती उमेरका किशोरीलाई खोप लगाइनेछ । खोपका लागि २ हजार ४१२ स्वास्थ्यकर्मी खटिनेछन् । कार्यालयका अनुसार खोप अभियान माघ २२ देखि फागुन ६ गतेसम्म सञ्चालन हुने छ । 

कोही किशोरी पनि खोपबाट वञ्चित नहुन् भन्ने उद्देश्यका लागि नगरपालिकामा प्रमुख र वडा कार्यालयमा वडाध्यक्षको संयोजकत्वमा खोप समिति गठन गरिने जनस्वास्थ्य कार्यालयका प्रमुख वसन्त अधिकारीले बताउनुभयो । 
उहाँले खोप लगाउन छुट्न सक्ने ठाउँको पहिचान गरेर विशेष अभियानसमेत सञ्चालन गरिने बताउनु भयो । 

सरकारले देशभरिका कक्षा ६ देखि १० सम्मका १० देखि १४ वर्ष उमेर समूहका १६ लाख ८८ हजार ९ सय किशोरीलाई लक्षित गरी क्यान्सरविरुद्धको खोप अभियान सञ्चालन गर्दै छ । 

पाठेघरको मुखको क्यान्सरको जोखिम बढाउने मुख्य कारण ह्युमन पापिलोमा भाइरस सङ्क्रमण रहेकाले यसविरुद्ध खोप लगाउनुपर्ने हुन्छ । 

नेपालमा महिलामा लाग्ने क्यान्सरमध्ये पाठेघरको मुखको क्यान्सर सबभन्दा बढी देखिने र त्यसपछि स्तन क्यान्सर रहेको छ ।