सिमान्तकृत समुदाय

कार्यालयको मूल ढोकाबाट छिर्नेबित्तिकै पोखरा महानगरपालिकाको सरसफाइ शाखामा भेटिन्छन्, हर्कबहादुर गायक (गन्धर्व) । तीस वर्ष जागिरे जीवन बिताएका उनले सारङ्गी सिकेनन् । शाखा अधिकृत भइसक्दा उमेरले ५५ टेकेका उनलाई अचेल महसुस हुन्छ, ‘सारङ्गी नसिकेर गल्ती गरेछु ।’  पोखरा झलकमान गन्धर्वको सहर हो । पोखरा सारङ्गीको सहर हो । सहरमा चलिरहेछ ‘पूर्णबहादुर सारङ्गी’ । अहिलेसम्म यो फिल्मले हिसाबकिताबका ‘रेकर्ड’ हरू तोडिसकेको छ । फिल्मले रुवाउँछ, हसाउँछ, जीवनसँग जोड्छ । यथार्थको नजिक पुर्‍याउँछ । पर्दाभित्रका पात्रमा आफू भेटिन्छ । फिल्मको धर्म ‘पूर्णबहादुरको सारङ्गी’ ले पूरा गरेको छ । फिल्म गन्धर्व समुदायको वास्तविकतासँग कति नजिक छ ?