आफन्तको जग्गा हत्याउन खोज्नेहरू प्रहरी अनुसन्धानमा

०७४ भदौ २६ मा मृत्यु भएकी उमादेवी गुरुङको कीर्तिपुरमा रहेको जग्गा हडप्ने सतराज गुरुङविरुद्ध जाहेरी दिएका दिदी पूर्णिमा गुरुङ र बहिनी मीरादेवी गुरुङ नै अनुसन्धान दायरामा

काठमाडौँ — मृतक उमादेवी गुरुङको जग्गा हत्याउन नक्कली कागजात बनाउने आफन्तमाथि प्रहरीले अनुसन्धान थालेको छ । कीर्तिपुरको जग्गा हडप्ने सतराज गुरुङविरुद्ध जाहेरी दिएका उमादेवीकी दिदी पूर्णिमा गुरुङ र बहिनी मीरादेवी गुरुङ नै अनुसन्धानको दायरामा तानिएका हुन् ।

उमादेवीका नाममा रहेको कित्ता नं. २०३ को ९९२.७० वर्गमिटर जग्गा मकवानपुरको थाहा नगरपालिका–१२ टिस्टुङका सतराजले नक्कली छोरो बनेर हत्याएका थिए । उनले नागरिकतालगायत सरकारी कागजातमा उमादेवीलाई आमा नाता स्थापित गरेर कलंकी मालपोत कार्यालयबाट ०८० वैशाख २७ मा जग्गा आफ्नो नाममा ल्याएका थिए ।

यो थाहा पाएपछि सतराजविरुद्ध पूर्णिमा र मीरादेवीले ०८० वैशाख २८ मा प्रहरीमा संयुक्त जाहेरी दिएका हुन् । पूर्णिमा र मीरादेवीले उमादेवीको ललितपुरमा रहेको जग्गा आफूहरूका नाममा सार्ने कानुनी प्रक्रिया चलिरहेका बेला सतराजले नक्कली नागरिकता र राहदानी बनाएर र विभिन्न सरकारी कार्यालयको कागजात किर्ते गरेर कीर्तिपुरको जग्गा आफ्नो नाउँमा पास गरेकाले कानुनबमोजिम गर्न माग गरेका थिए ।

उक्त जाहेरीमाथि महानगरीय प्रहरी परिसर टेकुले अनुसन्धान गर्नेक्रममा पूर्णिमा र मीरादेवीले नै जग्गा हत्याउने उद्देश्यले ललितपुर महानगर–२ र स्याङ्जाको बिरुवा गाउँपालिका–७ को वडा कार्यालयको नाम, छाप र दस्तखत किर्ते गरी उमादेवीसँगको नाता प्रमाणित र मृत्युदर्ताको नक्कली प्रमाणपत्र बनाएको खुलेको थियो । किर्ते गरेको खुलेपछि थप अनुसन्धान गर्न जिल्ला प्रहरी कार्यालय स्याङ्जालाई लेखी पठाएको महानगरी प्रहरी परिसर काठमाडौंका प्रवक्ता एवं प्रहरी उपरीक्षक (एसपी) कुमुद ढुंगेलले बताए । जिल्ला प्रहरी कार्यालय स्याङ्जाका नायब उपरीक्षक (डीएसपी) रवीन्द्र खनालले भने, ‘जुन वडा कार्यालय खुलाएर किर्ते कागजात बनाइएको छ, वडा कार्यालयले हामीले दिएको छैन भनिसकेको छ, अनुसन्धान भइरहेको छ ।’

पूर्णिमा, उमादेवी र मीरादेवी दिदीबहिनी हुन् । बुबाआमा बितेपछि जापानी नागरिक युवा मोहराले ललितपुर महानगरपालिका–२ स्थित घरमा उनीहरूको लालनपालन गरेका थिए । उमादेवीले ०३८ माघ ७ मा भारतको कर्नाटक राज्यका एमसी परेरासँग विवाह गरिन् । उनले ०४१ सालदेखि ०४४ सालसम्म सहायक प्राध्यापक भई त्रिभुवन विश्वविद्यालयको कृषि र पशु विज्ञान अध्ययन संस्थान रामपुर चितवनमा शिक्षण गरिन् । पछि श्रीमान्–श्रीमती मिलेर उमादेवीका नाममा दर्ता रहेको चितवनको जग्गामा नमुना कृषि फार्म सञ्चालन गरे । उनीहरूका तीन सन्तान भए । उमादेवीको ब्रेन ह्यामरेज भएर भारतमा उपचारक्रममा ६४ वर्षको उमेरमा ०७४ भदौ २६ मा मृत्यु भयो ।

reference : https://ekantipur.com