अपांगता परिचयपत्र पाउनै सास्ती

सामाजिक सुरक्षा भत्ता, निजामती सेवामा आरक्षण, निःशुल्क स्वास्थ्य र शिक्षा, सार्वजनिक यातायातमा छुट, सहायक उपकरणजस्ता सेवा लिन परिचयपत्र चाहिन्छ तर यसका लागि पूरा गर्नुपर्ने प्रक्रिया निकै झन्झटिला छन्

काठमाडौँ — भोजपुर बहिरा आवासीय आधारभूत विद्यालयको कक्षा चारमा पढ्ने रोजिना गिरी बालखैदेखि सुन्दिनन्, राम्रोसँग बोल्न सक्दिनन् । उनलाई दोभाषे चाहिन्छ । अरुण गाउँपालिकाको चरम्बीकी उनले ०७६ असार ९ मा पालिकाबाट पहेंलो रङको अपांगता परिचयपत्र पाइन् ।

अपांगता भएका व्यक्तिको परिचयपत्र वितरण कार्यविधि ०७५’ मा अपांगता भएकाको अशक्ततताको गाम्भीर्यका आधारमा परिचयपत्र वर्गीकरण गरिएको छ । पूर्ण अपांगता भएकालाई ‘क’ वर्ग अर्थात् रातो रङको, अति अशक्त अपांगतालाई ‘ख’ नीलो रङको, मध्यमलाई ‘ग’ पहेंलो रङको र सामान्य अपांगतालाई ‘घ’ वर्ग अर्थात् सेतो रङको वर्गीकरण गरिएको छ । रातो र नीलो रङ परिचयपत्र पाएकाले मात्रै भत्ता पाउँछन् । ‘क’ वर्गकाले मासिक ३ हजार ९ सय ९० र ‘ख’ वर्गकाले २ हजार १ सय २८ रुपैयाँ भत्ता पाउँछन् । अपांगता भत्ता पाउँदै आएका पूर्ण अपांगता भएका ६६ हजार १ सय ४९ र अति अशक्त अपांगता १ लाख ३८ हजार १ सय १६ जना रहेको राष्ट्रिय परिचयपत्र तथा पञ्जीकरण विभागको अभिलेख छ ।

Reference :  https://ekantipur.com/new