‘क्यान्सरलाई जितेपछिको मेरो जीवन सधैं संगीतका लागि’

काठमाडौं । जीवनमा कुनै ठूलो आपत् आइलाग्दा कस्तो हुन्छ ? पक्कै पनि चलिरहेको समय नै टक्क रोकिए झैं लाग्छ । गायिका देविका बन्दनाको जीवनमा पनि यस्तै भयो, सुरमा बगिरहेको संगीत अनायासै बेसुर भइदिए झैं । सबै ठीकठाक अवस्थामा चलिरहेको बेला देविकालाई स्वास्थ्यले अलि साथ दिएन, उनलाई स्तन क्यान्सर भयो । क्यान्सरसँगको संघर्षपूर्ण लडाइँले अन्तत: उनले यसलाई जितेरै छाडिन् ।

देश कोरोना महामारीका कारण लकडाउनमा थियो । अत्यन्तै ‘हेल्थ कन्सियस’ देविकाले सोचेकी पनि थिइनन् आफूलाई क्यान्सरजस्तो डरलाग्दो रोगले सताउला भनेर । दुई वर्षअघि उनी बुटवलस्थित घरमै थिइन्, स्तनमा सानो गाँठो देखियो । सामान्य नै होला भनेर उनले त्यहीं स्थानीय अस्पतालमा जाँच गराइन् र केही बिसेक भए झैं पनि लाग्यो । देश कोरोना महामारीले ठप्प भएका बेला उनले पनि डिजिटल माध्यमको प्रयोग गरी सांगीतिक कन्सर्टसमेत गरेकी थिइन् र त्यो निकै रुचाइयो पनि ।

अनलाइनखबरको गफ स्टेसनमा यो साता अन्तर्वार्ताका लागि आइपुगेकी उनले आफूलाई भएको क्यान्सर र त्यसलाई जितेपछिको अनुभव सबिस्तार सुनाइन् । ‘त्यसपछि चाहिं मलाई अलि गाह्रो भयो, दुखाइ धेरै भयो । अनि परिवार र डाक्टरको सल्लाहमा काठमाडौं आएर हरिसिद्दिस्थित नेपाल क्यान्सर अस्पतालमा डा. कपेन्द्र अमात्यलाई जाँच गराएँ,’ उनी सुनाउँछिन्, ‘त्यसपछि पुष्टि भयो मलाई ब्रेस्ट क्यान्सर भएको रहेछ ।’

डाक्टरले आफूलाई क्यान्सर भएको सुनाउँदा उनलाई समय नै टक्क रोकिए झैं भयो । त्यसपछि उनले सोचिन् अरु क्यान्सर पीडितलेजस्तै मैले पनि मृत्युवरण नै त गर्नुपर्ने हो कि भनेर । तर डा. अमात्यले उनलाई ढाडस दिए, ‘दिल्ली वा अरु देश कतै जानुपर्दैन यहीं म तपाईंको राम्रोसँग उपचार गर्छु, स्तन नकाटीकन उपचार गर्न सकिन्छ, आत्तिनु पर्दैन ।’

त्यसपछि दुई वर्ष उनी क्यान्सरको उपचार यात्रामा रहिन् । सुरुमा किमो चढाउँदा निकै गाह्रो भयो, बिस्तारै बानी पर्दै गएपछि सहज मान्दै गइन् । अब भने उनलाई जीवनप्रतिको आशा अरु जागृत भयो अनि जीवनलाई हेर्ने दृष्टिकोण पनि अझ फराकिलो भयो ।

‘त्यसपछि उपचारकै पिरियडमा ११ वटा गीत रेकर्ड गरें । त्यसबेला गिनिज बुक वर्ल्ड रेकर्ड्समा पनि नाम दर्ज गर्ने सफल भएँ,’ देविका भन्छिन्, ‘उपचार गर्ने क्रममा त मेरो संगीत र जीवनलाई हेर्ने दृष्टिकोण अरु फराकिलो भयो । संगीतमा अझ राम्रो गर्छु र क्यान्सरसँगको संघर्षपूर्ण यात्राको बारेमा अरुलाई पनि जानकारी दिन जित्नेको हाँसो शीर्षकमा किताब समेत लेखें ।’

आफ्नै गीत ‘यस्तै रहेछ यहाँको चलन’को एक अंश ‘जित्नेको हाँसो’लाई उनले पुस्तकको नाम दिइन् । किताब बिक्रीबाट आएको रकम क्यान्सर पीडितको सहयोगमा खर्च गर्ने उनको सोच छ ।

देविकाले अहिले क्यान्सरलाई जितिसकेकी छन् । तर आफूलाई क्यान्सर भएको कुरा उनले परिवारबाहेक अरुलाई सुनाइनन् । कारण थियो, अरुलाई सुनाउँदा धेरै सोधिने हालखबरले आफूलाई कमजोर महसुस पो गराउँछ कि भन्ने लाग्यो उनलाई । त्यसैले चुपचाप उपचार गरेर पुस्तक विमोचन गर्नेबेलामा मात्रै ‘सरप्राइज’ दिइन् ।

Reference:  https://www.onlinekhabar.com