एक गाँउ एक दलित पत्रकार बनाउनु पर्छः विनोद पहाडी

काठमाडौं । राष्ट्रिय दलित पत्रकार संघ नेपालले पाँचौं स्थापना दिवस मुलकभर मनाइएको छ । संघको स्थापना दिवसको अवसरमा अधिकाँश जिल्लाहरुमा अन्तरक्रिया कार्यक्रमहरु गरिएको छ । 
संघको स्थापना दिवसको अवसरमा काठमाडौं ‘आमसञ्चार माध्यम र समावेशीकरण’ विषयक कार्यक्रम आयोजना गरिएको छ ।  
अन्तरक्रियामा सञ्चार तथा सूचना प्रविधिमन्त्री रेखा शर्माले प्रमुख अतिथिको रुपमा बोल्दै  सञ्चारसम्वन्धि कानुनलाई समावेशी बनाउने बताउनुभयो । उहाँले अब बन्ने सञ्चारसम्वन्धी कानुन र सामाजिक सञ्जाल नियमन लगायतका सबै कानुनलाई हरेक हिसाबले समावेशी बनाउने प्रतिबद्धता गर्नुभएको छ ।
दलित समुदायले भोग्दै आएको जातीय भेदभाव तथा छुवाछूत लगायतका समस्या समाधानका लागि उहाँले ऐन, कानुनको प्रभावकारी कार्यान्वयन गर्न सचेतनामन कार्यक्रमहरु गर्नुपर्नेमा जोड दिनुभयो । उहाँले सरकारी सञ्चारमाध्यमलाई समावेशी बनाउन पहल गर्ने बताउनुभयो । 
समाजवादी प्रेस संगठनका अध्यक्ष विश्वमणी सुवेदीले वर्तमान व्यवस्था दलितमैत्री छैनन भन्नुभयो । उहाँले नेपाली सञ्चार माध्यम पनि दलितमैत्री बन्न नसकेको बताउनुभयो । पत्रकारका सबै संघ संगठनहरुले दलित समुदायका पत्रकारहरुलाई नेतृत्व तहमा लैजाने आँट गर्नुपर्ने उहाँको धारणा रहेको छ ।
उहाँले नेपाल पत्रकार महासंघको निर्वाचन आउनैलाग्दा दलित, जनजाति, मधेशी र उत्पीडनमा परेका पत्रकारलाई छानीछानी सदस्यता पाउनबाट बञ्चित गरिएको कारण त्यसलाई सच्याउनुपर्नेमा जोड दिनुभयो ।  
सो कार्यक्रममा नेपाल प्रेस युनियनका सचिव लाल कुमार मोक्तान, प्रेस चौतारी नेपालका उपाध्यक्ष सविन प्रियासन, जनपत्रकार संगठनका अध्यक्ष शेरबहादुर विश्वकर्मा, श्रमजीवी पत्रकार संघका अध्यक्ष जन्मदेव जैसी, आदिवासी जनजाति पत्रकार महासङ्घ (फोनिज) का अध्यक्ष गजुरधन राई, जागरण मिडया सेन्टरका अध्यक्ष कमला विश्वकर्मा, सञ्चारिका समूहका अध्यक्ष विमला तुम्खेवा, मधेशी पत्रकार समाजका अध्यक्ष मोहन सिंह लगायतले आमसञ्चार माध्यमलाई विषयवस्तु र सहभागिताको हिसाबले समावेशी बनाउनुपर्नेमा जोड दिए ।
कार्यक्रममा पूर्वमन्त्री जितु गौतम, पूर्व राजदूत पदम सुन्दास, वरिष्ठ पत्रकार बालकृष्ण चापागाई लगायतले राज्यलाई पूर्ण समावेशी बनाउनुपर्नेमा जोड दिनुभयो ।  
कार्यक्रममा राष्ट्रिय दलित पत्रकार संघ नेपालका अध्यक्ष तथा संविधनसभा सदस्य विनोद पहाडीले प्रत्येक गाउँबाट एक जना दलित पत्रकार बनाउनु पर्ने बताउनु भयो । 
उहाँले  दलित समुदायहरुका साझा एजेण्डा बोक्ने र दलित समुदायलाई राज्यको मुलप्रवाहमा पुर्याउने उद्देश्यले राष्ट्रिय दलित पत्रकार संघ नेपालको गठन भएको स्पष्ट पार्नुभयो  ।

अध्यक्ष पहाडीले भन्नुभयो ‘एक गाउँ एक दलित पत्रकार चाहिन्छ, यसले मात्र दलितहरुका मुद्धा उठाउन सकिन्छ, दलितहरुका मुद्धा साझा मुद्धा हुन, सबै विचार आस्था राख्नेहरुको यो संगठन हो ।’
उहाँले संघले स्थापना गरेको विभिन्न पुरस्कार राशीहरुको चर्चा गर्दै दलितमाथि हुने कुनै पनि विभेद विरुद्ध र समाज रुपान्तरणको अभियानमा योगदान दिने पत्रकारहरुलाई सम्मान गर्ने बताउनुभयो । साथै उहाँले दलित समुदायका पत्रकारहरुले चलाएको संचार मिडियाहरुमा राज्यले रोयल्टी र कर छुट दिने व्यवस्था गर्न पनि माग गर्नुभयो ।
 

३ पत्रकार सम्मानित
राष्ट्रिय दलित पत्रकार संघको पाँचौं स्थापना दिवसको अवसरमा पत्रकारीता क्षेत्रमा महत्वपूर्ण योगदान दिने ३ जना पत्रकारलाई सम्मान गरेको छ ।
संघले खोज पत्रकार बाबुराम विश्वकर्मा, अन्नपूर्ण दैनिकमा कार्यरत राजकरण महतो र समखवर डटकमकी सम्पादक शोभा विश्वकर्मालाई सम्मान गरेको हो । सञ्चार तथा सूचना प्रविधिमन्त्री रेखा शर्माले उहाँहरुलाई सम्मान गर्नुभयो । 
संघले आफ्नो स्थापना दिवस, साधारण सभा र महधिवेसनमा सञ्चार क्षेत्रमा योगदान दिने सञ्चारकर्मी, दलित आन्दोलनमा योगदान दिने र क्रियाशील पत्रकारहरुलाई सम्मान तथा पुरस्कृत गर्दै आएको छ । संघले स्थापना कालमै घोषणा गरेको अग्रज पत्रकार स्व. टीआर विश्वकर्मा स्मृति पत्रकारीता पुरस्कार, देवव्रत स्मृति पत्रकारिता पुरस्कार, राममाया च्यामे स्मृति पत्रकारीता पुरस्कार, परशुसवरी स्मृति पुरस्कार लगायतका पुरस्कार प्रदान गर्दै आएको छ ।
कपिलवस्तुको तिलौराकोटमा दिप प्रज्वलन गरी शुभकामना आदान प्रदान गरिएको छ । त्यसैगरी अछाम जिल्लामा रक्तदान कार्यक्रम आयोजना गरिएको छ ।
संघको उपत्यकासहित ८ प्रदेश समिति र ६५ जिल्लामा जिल्ला शाखा गठन भएका छन् । संघमा देशभर करिव एक हजार दुई सय सदस्य आवद्ध छन् ।