धार्मिक प्रवचनबाट विभेद अन्त्यको सुरुवात : आचार्य कृष्ण दमाईं

कात्तिक ५ गते ।
दलितहरुले वेद पढ्नुहुन्न, शुद्रहरु अछुत हुन् भन्ने भ्रम फैलाईएका कारण उनीहरुलई धर्म संस्कार मठ मन्दिरदेखी टाढा राखियो । उनीहरु संस्कृत त पढ्नै पाएनन् । त्यसैले संस्कृतमा आचार्य गर्नेहरु व्रम्हाणहरु भए । राजकाज गर्ने शुरवीर क्षत्रीहरु भए । अनि दलितहरु उनीहरुका सेवा गर्ने । उच्च जातका कथित व्रम्हाण क्षत्रिहरुले शुद्रहरुमाथी विभेद गर्दै आए । वास्तवमा धमर्मा कुनै पनि विभेद थिएन । कुनै पनि जातलाई विभेद गरिएको थिएन । उच्च जातकाले शुद्र भनी विभेद र उत्पिडन, दमन गर्दै आए । 
त्यसैको प्रतिकारमा दलितहरु अध्ययनको दायरा बढाउदै गए । संघर्ष गर्दै आए । कालान्तरमा आफ्नो अधिकार खोज्न बाध्य भए ।

अहिले दलितहरु पनि संस्कृत पढ्न थालेका छन् । पछिल्लो समय बैतडीका कृष्ण दमाईंले उत्तीर्ण गर्नुभयो । अहिले उहाँलाई देशका विभिन्न धार्मिक अनुष्ठान र महायज्ञमा सम्मानसाथ बोलाइन थालेको छ । यस्तै संस्कृत पढ्ने दलितहरु र धर्मको ज्ञान दिने पण्डितहरुको झुण्डले जातप्रथा र भिभेदको विरुद्ध बोल्दै गए छिटै विभेद कम हुनेछ । 

अहिले जातीय विभेद र कुसंस्कारको अन्त्य गर्न गण्डकी प्रदेशको पोखरामा आयोजित धार्मिक अनुष्ठानमा पुग्नुभयो। सुदूरपश्चिम प्रदेशबाट आचार्य कृष्ण दमाईंसंग ज्योतिष पं. गणेशप्रसाद पन्त सहभागी हुनु भयो ।  विश्वकर्मा वैदिक कर्मकाण्ड समाज कास्की पोखराको आयोजनामा कात्तिक २ र ३ गते पोखरा बैदामस्थित केदारेश्वर महादेव मन्दिर, संस्कृत गुरुकुलसमेत रहेको बोलबम धाममा आयोजित धार्मिक अनुष्ठान तथा महायज्ञमा देशका विभिन्न जिल्लाबाट ब्राह्मण र दलित समुदायका धर्मगुरुको सहभागिता रहेको थियो । 

पोखरामा पहिलो पटक गुरुकुलमा जातीय विभेदरहित तवरले पूजा, हवन, प्रवचन एवं गुरुकुलका बटुकसहित संयुक्त भोजन ग्रहण गरिएको आयोजले जानकारी दिएको छ । धार्मिक अनुष्ठानमा दलित, जनजाति परिवारबाट संस्कृत पढेका गुरुहरूको संयुक्त उपस्थितिमा गुरुकुलका बटुकहरूसँग रुद्राभिषेक, हवन, लाखबत्ती प्रज्वलन एवं दुईदिने प्रवचन कार्यक्रम गरिएको हो । 

धार्मिक अनुष्ठानमा अग्निस्थापन, जपहवन, तर्पण मार्जन, ब्राह्मण भोजन, शिल्पी समुदायबाट प्रमुख यजमान, वेद पाठ, गायत्री मन्त्र दीक्षा, एकाह श्रीमद्भागवत महापुराण पाठपारायण, चार वेद पाठ, लघुरुद्राभिषेक, नवचण्डी आदि अलौकिक कार्यक्रम गरी चार सयभन्दा बढी दलित समुदायका व्यक्तिलाई समावेश गराएको बताइएको छ । कार्यक्रममा केदारेश्वर धामका प्रमुख डा. लेखनाथ आचार्य (स्वामी विद्वत् चैतन्य) पण्डित दीनबन्धु पोखरेल, पण्डित भीमकान्त पन्थी, पण्डित गणेशप्रसाद पन्त, पण्डित चन्द्रकान्त पौडेल, पण्डित राजानन्द माण्डव्यलगायतले ब्राह्मण समुदायको प्रतिनिधित्व गरेर प्रवचन गर्नुभएको थियो । 

त्यसै गरी दलित समुदायको प्रतिनिधित्व गर्दै आचार्य कृष्ण दमाईं, पण्डित लक्ष्मण रसाइली, पण्डित किरण लामगादेलगायत अन्य विभिन्न गुरुहरू एवं विदुषी माताहरूले कथा प्रवचन एवं भजनकीर्तन गरेको आचार्य कृष्ण दमाईंले जानकारी दिनुभयो । 

बोलबम धामका प्रमुख स्वामी विद्वत् चैतन्यले नेपालभरिका धर्मगुरुले यस्तै किसिमका कार्यक्रम गरेर धर्मरक्षाका लागि अगाडि आउनुपर्नेमा जोड दिएको सहभागी बैतडीका ज्योतिष पं. गणेशप्रसाद पन्तले जानकारी दिनुभयो । आचार्य कृष्ण दमाईजस्ता संस्कृतमा आचार्य गर्नुभएका प्रतिभालाई गुरुकुलमै गुरु बनाएर राख्नुपर्ने धारणा पण्डित चन्द्रकान्त पौडेलले व्यक्त गर्नुभएको उहाँले जानकारी दिनुभयो ।

श्रीहरि विश्वकर्मा र राजेन्द्र भुसालको संयुक्त सङ्कल्पमा कार्यक्रम गरिएको समाजसेवी बेलबहादुर विश्वकर्माले बताउनुभयो । संस्थाले आगामी दिनमा सबै प्रदेशमा रहेका गुरुकुलहरू एवं धार्मिक मठमन्दिरमा यस किसिमका समावेशी कार्यक्रमको निरन्तरता दिइने विश्वकर्मा वैदिक कर्मकाण्ड समाज कास्कीका अध्यक्ष वास्तुविद् पण्डित लक्ष्मण रसाइलीले बताउनुभयो ।