सर्लाहीका अन्तरजातीय विवाहित जोडीको सम्बन्ध तोड्न राज्यको दुसाहस

मन मिलेर प्रेम गर्नेहरु, जात नमिलेका कारण धोका खाने मात्र हैन समाजमा जातिय तिरस्कार हुनुुपर्ने वा वहिष्कार हुनुपर्ने र ज्यान गुमाउनुपर्ने घटनाको अन्त्य हुन सकिरहेको छैन । अन्तरजातिय प्रेम जोडीलाई छुटाउन परिवार मात्र हैन, समाज मात्रै हैन, राज्यका ठुला ओहदामा भएका वा पार्टीक ठूला मान्छेहरुकै ठूलै हात हुन्छ । 
राज्यले एउटा नीति ल्याउछ, नीतिको ठीक उल्टो अर्काे व्यवहार गरिन्छ । त्यस्तै अहिले राज्यको व्यवहार विरुद्ध एउटा अर्काे घटना बाहिर आएको छ । सर्लाहीमा भएको एउटा घटना अन्तरजातिय विवाहमाथी जातिय ज्यादती भएको पाईएको छ ।   

सर्लाहीको बरहथवा नगरपालिका– ४ का सत्येन्द्रकुमार राम (चमार) र बरहथवा– ५ की नेहा रौनियारको अन्तरजातीय प्रेमविवाह भयो । तर उनीहरुमाथी ज्यादती गरिएको पाइएको छ, । गृहमन्त्री र उच्च प्रहरी अधिकारीकै संलग्नतामा अन्तरजातिय विवाह दर्ता गरिएको नेहा रौनियार र सत्येन्द्रकुमारको जोडी छुटाउन लागि परेको छ । 
विवाह पछि भारतको मुम्बई घुम्दै  गरेका जोडीलाई नेपाल प्रहरीले उही पुगेर पक्राउ गरी सत्येन्द्रविरुद्ध बालविवाहको मुद्दा लगाएर, लागुऔषधदेखि मानव बेचबिखनसम्मको मुद्दामा फसाउने धम्क्यायो । त्यसपछि उनीहरु मानव अधिकार आयोगमा उजुरी दिए । साथै सर्वाेच्च अदालतमा बन्दीप्रत्यक्षीकरणको रिटसमेत दायर गरेका छन् । फलस्वरुप सर्वाेच्चले नेहालाई सत्येन्द्रकै जिम्मा लगाउने गरी रिट जारी गरेको छ । मानव अधिकार आयोग भने अनुसन्धान गरिरहेको बताएको छ । 

नेहाका बुबा सुरेन्द्र रौनियार कांग्रेसका प्रभावशाली नेता गृहमन्त्री रमेश लेखक निकटका एक व्यापारी हुन् । सोही आधारमा गृहमन्त्रीमार्फत प्रहरी लगाइ सत्येन्द्रलाई थुनाएर सम्बन्ध तोड्न खोजेका देखिन्छन् । यसले जातीय भेदभाव तथा छुवाछुत घटनामा अनुसन्धान र कारबाही गर्ने प्रहरी आफैँ मुछिएको पाईन्छ ।

यता राष्ट्रिय मानव अधिकार आयोगको प्रारम्भिक छानबिनले भने गृहमन्त्रीकै निर्देशनमा प्रहरी शक्तिको दुरुपयोग भएकोे निष्कर्ष निकालेको छ । विद्यालय संगै पढेका सत्येन्द्र र नेहाको सात कक्षा सात प्रेम सम्बन्धमा थिए । आठ कक्षापछि विद्यालय फेरिएपनि उनीहरुको प्रेम सम्बन्ध छुटेको थिएन । काठमाडौं पढ्न आएका युवकसँग नेहा पनि भागेर सँगै आएका बसेकी थिईन । प्रहरीले दुवैलाई पक्राउ गरेर छुटाइएको थियो ।

सर्लाहीबाट काठमाडौंमा आई बस्न नसकेपछि दुवै भागेर कपिलवस्तु गएका थिए । त्यसपछि २१ मंसिरमा मुम्बई घुम्न पुगे । नेहाको परिवारले थाहा पाएपछि गृहमन्त्रीलाई भनेर मुम्बईमा विशेष प्रहरी टोली पठाई गत २५ मंसिरमा काठमाडौं उपत्यका अपराध अनुसन्धान कार्यालयका तत्कालिन डिएसपी रुगम कुँवर(हाल एसपी) र सहायक हवल्दार इन्द्र पोखरेल युवतीका बुबा सुरेन्द्रसँगै मुम्बई पुगे । त्यसपछि प्रहरीसँग समन्वय गरी किशोर–किशोरीलाई पक्राउ गरी प्लेनमार्फत नै दिल्ली ल्याइयो । सत्येन्द्र र नेहा दुवैले आफूहरू विवाह गरेर आएको, आफूहरूलाई छुटाउनकै लागि गैरकानुनी रूपमा पक्राउ गरिएको त्यहाँका सुरक्षाकर्मीसँग बताए । त्यसपछि विमानस्थलमै हंगामा भयो । पक्राउ गर्न गएको प्रहरी टोली आफूहरू नै समस्यामा पर्न सक्ने डरले उनीहरूलाई छाडेर नेपाल आयो ।

सत्येन्द्र र नेहा सडकबाटो हुँदै कपिलवस्तु पुगे । त्यतिवेलासम्म उनीहरूको विवाहका लागि न्यूनतम २० वर्ष उमेर पनि पुगिसकेको थियो । कपिलवस्तु जिल्ला अदालतमा ३ पुसमा ‘कोर्ट म्यारिज’ गरे । विवाहपछि दुवैजना ललितपुरको टीकाथलीमा बस्दै आएका थिए । किशोरीका बुबाले फेरि प्रहरी लगाएर युवकलाई थुनाउने योजना बनाए । यसका लागि जिल्ला प्रहरी कार्यालय, सर्लाहीमा बालविवाहको जाहेरी दर्ता गराए । त्यसपछि पक्राउका लागि प्रहरी टोली खटाइयो । गत १६ पुसमा काठमाडौं उपत्यका अपराध अनुसन्धान कार्यालयको टोलीले दुवैजनालाई टीकाथलीमै पक्राउ ग¥यो । युवकलाई बालविवाह मुद्दामा सर्लाही जिल्ला अदालतमा पेस गरियो । युवतीलाई माइती पक्षको जिम्मा लगाइयो । जबकि त्यसवेलासम्म उमेर पुगेरै उनीहरूले विवाह दर्तासमेत गरिसकेका थिए ।

प्रहरी स्रोतका अनुसार गृहमन्त्री लेखकले प्रहरी महानिरीक्षक वसन्तबहादुर कुँवर र अपराध अनुसन्धान कार्यालयका तत्कालीन प्रमुख एसएसपी सानुराम भट्टराईलाई भनेर उनीहरूलाई पक्राउ गरेर ल्याउन टोली भारत पठाएका हुन् ।