समाज

साउन दोस्रो साता। नेकपा (एमाले)को ग्रासरुट अभियान चलिरहेको थियो। म पनि उक्त पार्टीको सिपाही भएकाले बैतडीको पाटनमा खटिएकी थिएँ। कार्यक्रमकै बीचमा मोबाइलको घण्टी बज्यो-‘तपाईले जातीय विभेदविरुद्ध अहिलेसम्म गरेका मुख्य कामहरूबारे जानकारी गराइदिनुहोस् न।’ मैले त्यसलाई सामान्य रूपमा लिएँ र खासै चासो दिन आवश्यक ठानिन। केही दिनपछि उनले फेरि फोन गरे। त्यसपछि आफूले गरेका केही काम टिपेर पठाइदिएँ। त्यसको केही दिनपछि सोही मानिसको फोन आयो। म आफैँ अध्यक्ष रहेको भूमिमा महिला कृषि सहकारीको कार्यालयमा थिएँ। उनले केही दिनअघि सूचना माग्ने व्यक्ति आफैँ भएको र म अमेरिकी सरकारद्वारा प्रदान गरिने एउटा पुरस्कारका लागि छानिएको जानकारी दिए। अनि आवश्यक परेमा एक्लै अमेरिका जान सक्नुहुन्छ भनेर पनि सोधे।