विचार

जनताले आफ्नो शासक आफैं चुन्न सक्ने व्यवस्था लोकतन्त्र हो । २० औं शताब्दीमा विश्वभरिका धेरै मुलुकमा परम्परागत शक्तिलाई परास्त गर्दै लोकतन्त्रको स्थापना गर्ने लहर चल्यो । फलस्वरूप आज लोकतन्त्र सबैभन्दा लोकप्रिय शासन व्यवस्था बन्न पुगेको छ । यसलाई संस्थागत गर्न नयाँ लोकतान्त्रिक मुलुक लागिपरेका छन् । हामीले पनि लोकतन्त्र स्थापनार्थ धेरै संघर्ष गर्‍यौं । जननिर्वाचित संविधानसभाले नै संविधान बनाउने सपना बुन्दै २००७ सालमा सुरु भएको हाम्रो संघर्षले साढे छ दशकपछि मात्र सार्थकता पाउन सक्यो । यसका लागि लाखौं नेपाली जनताले संघर्ष गर्नुपर्‍यो । हजारौं सहिदले ज्यान गुमाउनुपर्‍यो ।