अहिले पनि जातीय विभेद कायम रहनु दुःखद् हो : सांसद विश्वकर्मा

कालिका खड्का

काठमाडौँ, मंसिर ७ गते । सांसद हर्कमाया विश्वकर्माले अझै पनि जातीय विभेद कम हुन नसकेकोप्रति दुःख व्यक्त गर्नुभएको छ । जातीय विभेदका घटना पटक पटक संसद्मा उठाए पनि खासै सम्बोधन हुन नसकेको उहाँको भनाइ छ ।   

“सांसद भएर काम सुरु गरेको एक वर्ष भयो, म सांसद भएर आएपछि पनि ३०–३२ जातीय विभेदका घटना घटे तर एउटैको पनि सुनुवाइ भएन” सांसद विश्वकर्माले भन्नुभयो, “मैले पटक पटक सदनमा आवाज उठाए, सुनुवाइ हुँदैन, जातीय विभेदको कुरा अहिले पनि कम हुन सकेको छैन, जुन दुःखद् कुरा हो ।” 

उहाँ आफ्नो समुदायको विभेद न्यूनीकरण गर्न पटक पटक आवाज उठाएको सम्झनुहुन्छ । तर एकाधबाहेक सम्बोधन नभएको उहाँको भनाइ छ । “मैले विभेद कम गर्न सदनमा आवाज उठाउँछु, आफ्नो क्षेत्रको समस्या समाधान, रोकथाम गर्नका लागि काम गरिरहेकै छु” सांसद विश्वकर्माले भन्नुभयो ।  

सांसद विश्वकर्माको जन्म झापाको लखनपुर –३ मा भएको हो । वि.सं २०४० देखि राजनीतिक यात्रा प्रारम्भ गर्नुभएकी उहाँले नेकपा (एमाले) को  विद्यार्थी सङ्गठन अनेरास्ववियुको प्रारम्भिक कमिटीदेखि नै काम गर्नुभएको हो । झापा –२ बाट समानुपातिकबाट प्रतिनिधित्व गर्नुहुने सांसद विश्वकर्माले पार्टीको वडा कमिटी हुँदै पार्टीभित्र दलित मुक्ति आन्दोलनमा सक्रियारुपमा काम गर्नुभयो । उहाँले दलित मुक्ति मोर्चाको जिल्ला सचिव भएर काम गर्दै अहिले मुक्ति समाजको केन्द्रीय सचिवालय सदस्य र महिला विभागको केन्द्रीय सचिव भएर काम गरिरहनुभएको छ ।  

सांसद विश्वकर्माले संविधान अनुकूलका कानुन बनाउन धेरै बाँकी भए पनि सरकारले संविधान कार्यान्वयन गर्न आवश्यक कानुन बनाउन ध्यान नदिएकामा दुःख लागेको बताउनुभयो । “कानुन बनाउने कुरामा प्रतिपक्षको भन्दा पनि सत्तापक्षले अलि बढी ध्यान दिनुपर्ने हुन्छ” उहाँले थप्नुभयो, “सरकारले बनाउनुपर्ने कानुन सदनमा ल्याएर छलफल गराउनुपर्ने हुन्छ तर त्यो हुन सकेको छैन ।” उहाँले कानुन बनाउनुपर्ने कुरामा धेरै पटक सदनमा उठाएको तर सरकारले गम्भीरतापूर्वक नलिएको अनुभव सुनाउनुभयो । कानुन बनाउने कुरामा सत्तापक्ष र प्रतिपक्ष भनेर बस्न नहुने उहाँको बुझाइ छ । 

सांसद विश्वकर्मालाई सत्तापक्ष र प्रतिपक्षबिच आरोपप्रत्यारोप गर्नु संसदीय अभ्यासमा सामान्य कुराजस्तो लागे पनि सदन प्रतिपक्षको भएकाले सरकारले अलि बढी ध्यान दिनुपर्छ भन्ने लाग्छ । “सरकारले गल्ती गरेको अवस्थामा प्रतिपक्षले आवाज उठाउने ठाउँ सदन हो, त्यो कुरा सरकारले पनि बुझ्न जरुरी छ”, उहाँले भन्नुभयो, “तर आरोपप्रत्यारोप गरेर समस्याको समाधान हुँदैन, जनताको समस्या समाधानमा जनप्रतिनिधिले ध्यान दिनुपर्छ ।”  

जनताका प्रतिनिधि अत्यन्तै इमान्दार, संवेदनशील भएर जनताको हित हुनेगरी बोल्नुपर्छ भन्ने सांसद विश्वकर्मालाई लाग्छ । “जनताको समस्या समाधान गर्ने तरिकाले जनप्रतिनिधि सदनमा सभ्य भएर आफ्नो कुराहरू राख्नुपर्छ” उहाँले भन्नुभयो, “सरकारको ध्यानाकर्षण सभ्य तरिकाले पनि गर्न सकिन्छ, गैरजिम्मेवार तरिकाले कहिले पनि प्रस्तुत हुन हुँदैन ।”   

नेपालको राजनीतिक परिपाटीमा सांसदहरू विकास निर्माणमा बढी केन्द्रित हुनुपर्ने जरुरी भएको उहाँको बुझाइ छ । विधायक भनेको कानुन बनाउने हो भनेर नेपाली समाजमा बुझाउन नसकिएको भन्ने उहाँलाई लाग्छ । “जनताले विकासकै आशा गरेका हुन्छन्, चुनावमा भोट माग्दा पनि कुन नेताले के बनाउने भन्ने बोल्यो भन्ने आधारमा मत निर्धारण हुन्छ” उहाँले भन्नुभयो, “म यहाँ बाटो बनाउँछु, त्यहाँ पुल बनाउँछु, यति बजेट हालिदिन्छु भनेर वचन दिएको हुन्छ, सांसदमा पनि विकास निर्माणमा ध्यान दिँदा लोकप्रिय भइन्छ भन्ने छ ।”     

सांसद विकास कोष बढी मात्रामा पहुँच हुनेले मात्र प्रयोग गरेको पाइएकाले त्यो नहुँदा नै ठीक भएको उल्लेख गर्दै उहाँले थप्नुभयो, “जहाँ विकास जरुरी छ, त्यहाँ विकास गर्नुपर्छ, निर्वाचित सांसदको हालीमुहाली हुने तर समानुपातिक सांसदलाई साक्षी मात्र बनाउने परिपाटी पनि गलत हो ।”

सांसद विश्वकर्मालाई सत्तापक्ष वा प्रतिपक्ष सबै मिलेर देशमा भएका विकृति, विसङ्गति, सबैखाले विभेदको अन्त्यका लागि पहल गर्नुपर्छ भन्ने लागेको छ । कुनै पनि प्रकारको कुरीति र कुसंस्कारको विरुद्धमा सबै एकताबद्ध हुन उहाँको आग्रह छ । रासस

Source: Gorkhapatraonline.com